खोज

जुम्ला, २१ साउन – जुम्लास्थित कर्णाली स्वास्थ्य विज्ञान प्रतिष्ठानमा भिडियो एक्सरे र अल्ट्रासाउण्ड सेवा एक महिनादेखि बन्द भएको छ। यसले उपचारका लागि प्रतिष्ठानमा आएका सेवाग्राहीलाई ठूलो सास्ती भएको छ।

तिला गाउँपालिकाका टोपबहादुर रावतका अनुसार अस्पतालमा आएका बिरामी भिडियो एक्सरे सेवाबाट वञ्चित भएका छन्। भिडियो एक्सरे मेसिन भए पनि जनशक्ति अभावका कारण सेवा बन्द गरिएको प्रतिष्ठानका निमित्त उपकुलपति सहप्राध्यापक डा. डबलबहादुर धामीले जानकारी दिए।

उनका अनुसार प्रतिष्ठानले रेडियोलोजिस्ट पदका लागि विज्ञापन गरेको भए पनि अहिलेसम्म कोही सम्पर्कमा नआएकोले समस्या उत्पन्न भएको हो।

यसैबीच, एक सातादेखि रोकिएको सिटिस्क्यान सेवा भने पुनः सञ्चालनमा ल्याइएको निमित्त उपकुलपति डा. धामीले जानकारी दिएका छन्।