खोज

वीरगञ्ज (पर्सा), २७ साउन — वीरगञ्ज कारागारका एक कैदीको उपचारका क्रममा मृत्यु भएको छ। कर्तव्य ज्यान मुद्दामा कैद भुक्तान गरिरहेका वीरगञ्ज महानगरपालिका–२५ का ४० वर्षीय राहुलकुमार साहको आज बिहान नारायणी अस्पतालमा निधन भएको हो।

कारागार प्रमुख खिमराज भुसालका अनुसार साहलाई बिहानदेखि छाती दुख्ने र सुन्निने समस्या देखिएपछि अस्पताल पु(याइएको थियो। उपचारकै क्रममा उनको मृत्यु भएको हो। साह २०७९ सालदेखि कर्तव्य ज्यान मुद्दामा सजाय काटिरहेका थिए।

मृत्युपछि नारायणी अस्पताल परिसरमा आफन्तजनले विरोध प्रदर्शन गरेका छन्। पर्सा प्रहरीका सूचना अधिकारी तथा डिएसपी किशोर लम्सालका अनुसार स्थिति नियन्त्रणका लागि पर्याप्त सुरक्षाकर्मी खटाइएको छ। “शान्ति सुरक्षा कायम गर्न प्रहरीले आवश्यक व्यवस्था गरेको छ,” उनले भने।