खोज

काठमाडौँ, ७ भदौ। कान्तिपुर डेन्टल कलेज टिचिङ हस्पिटल एण्ड रिसर्च सेन्टर र भारतको पण्डिचेरीस्थित माहे इन्स्टिच्युट अफ डेन्टल साइन्स (माइन्डस्) बीच शैक्षिक र प्राविधिक सहकार्यका लागि समझदारी पत्रमा हस्ताक्षर भएको छ।

सम्झौताअनुसार दुवै संस्थाबीच विद्यार्थी र संकाय आदानप्रदान, संयुक्त अनुसन्धान, सेमिनार र सम्मेलनको सह–आयोजनासहित ज्ञान र सीप आदानप्रदान हुनेछन्। यस सहकार्यबाट दन्त उपचार क्षेत्रमा नवीनतम प्रविधिको प्रयोग गर्दै गुणस्तरीय शिक्षा र सेवा प्रवाह गर्ने लक्ष्य राखिएको छ।

शुक्रबार सम्पन्न हस्ताक्षर कार्यक्रममा कान्तिपुर डेन्टल कलेजका अध्यक्ष डा. बुद्धिमान श्रेष्ठ र प्रमुख कार्यकारी अधिकृत प्रतीकमान श्रेष्ठले हस्ताक्षर गरेका थिए भने माइन्डस् तर्फबाट अध्यक्ष केपी रमेशकुमार र प्रिन्सिपल प्रा. अनिल मलेथले हस्ताक्षर गरेका छन्।

यस सहकार्यबाट अन्तर्राष्ट्रिय स्तरमा प्रतिस्पर्धी दन्त चिकित्सक तयार हुने र दक्ष मानव संसाधन उत्पादन हुने विश्वास व्यक्त गरिएको छ।