खोज

काठमाडौँ, ८ भदौ । वीरगञ्ज महानगरपालिकामा हैजाको प्रकोप समुदायस्तरमै फैलिएको भन्दै आइतबार र सोमबार दुई दिनका लागि सम्पूर्ण सामुदायिक तथा संस्थागत विद्यालय बन्द गरिएका छन्।

महानगरको शैक्षिक प्रशासन महाशाखाले जारी गरेको सूचनामा संक्रमण बढ्दै गएको परिस्थितिलाई मध्यनजर गर्दै पठनपाठन स्थगित गरिएको उल्लेख छ।

जिल्ला जनस्वास्थ्य कार्यालय पर्साका अधिकृत जयमोद ठाकुरका अनुसार शनिबार रातिसम्म वीरगञ्जका विभिन्न अस्पतालमा उपचाररत बिरामीमध्ये ४२ जनामा हैजा पुष्टि भएको छ। हाल १२९ जना उपचाररत छन्, जसमा ११ जनाको आईसीयूमा उपचार भइरहेको छ।

संक्रमण नियन्त्रणका लागि संघीय, प्रदेश र स्थानीय सरकारका स्वास्थ्य निकाय सक्रिय छन् भने विश्व स्वास्थ्य संगठन (WHO) नेपालले प्राविधिक टोली र उपचारका लागि आवश्यक सामग्री उपलब्ध गराउँदै सहयोग गरिरहेको छ।