खोज

काठमाडौँ, १७ भदौ । चिकित्सा शिक्षा सुधारका अभियन्ता डा. गोविन्द केसीले आफ्नो २३औँ अनशन आज तोडेका छन् । कैलालीस्थित गेडा अस्पतालमा गत शनिबारदेखि अनशनरत डा. केसीले मंगलबार दिउँसो करिब २ बजे अस्पतालमै उपचाररत बिरामी प्रितम चौधरीको हातबाट जुस पिई अनशन तोडेका हुन् ।

डा. केसीले निजी मेडिकल कलेजहरुले एमबीबीएस र बीडीएसमा सीट बढाउने निर्णय फिर्ता लिनुपर्ने, विश्वविद्यालय तथा प्रतिष्ठानमा पदाधिकारी नियुक्ति गर्न एकीकृत मापदण्डसम्बन्धी ऐन पारित गर्नुपर्ने, भारतद्वारा अतिक्रमित लिपुलेकलगायतका भूभाग फिर्ता हुनुपर्ने, गाजा तथा युक्रेनमा भइरहेका युद्ध अन्त्य हुनुपर्ने जस्ता माग राख्दै ३ दिनअघि अनशन सुरु गरेका थिए ।

उनले पटक–पटक अनशनमार्फत चिकित्सा शिक्षा र स्वास्थ्य क्षेत्रमा सुधारका लागि दबाब सिर्जना गर्दै आएका छन् । यसअघि पनि उनले मेडिकल शिक्षा ऐन ल्याउनदेखि स्वास्थ्य सेवा पहुँचयोग्य बनाउन विभिन्न मागसहित २२ पटकसम्म अनशन बसेका थिए ।