खोज

भक्तपुर,  भदौ। सहिद धर्मभक्त राष्ट्रिय प्रत्यारोपण केन्द्रले एकै व्यक्तिमा तेस्रो पटक मिर्गौला प्रत्यारोपण सफलतापूर्वक सम्पन्न गरेको छ।

केन्द्रका कार्यकारी निर्देशक डा. पुकारचन्द्र श्रेष्ठका अनुसार नेपालमै पहिलोपटक सुदूरपश्चिम प्रदेशका पूर्वमन्त्री लक्ष्मणकिशोर चौधरीमा तेस्रो मिर्गौला प्रत्यारोपण गरिएको हो। भदौ ९ गते सम्पन्न प्रत्यारोपणपछि चौधरीलाई आज डिस्चार्ज गरिएको छ।

डा. श्रेष्ठले तेस्रो पटक मिर्गौला प्रत्यारोपण विश्वमै दुर्लभ हुने बताए। उनका अनुसार प्राविधिक जटिलता, दाता पाउन कठिनाइ र औषधीय चुनौतीका कारण तेस्रो प्रत्यारोपण निकै जोखिमपूर्ण हुन्छ। तर बेलायतमा प्राप्त अनुभवका आधारमा नेपालमै सम्भव भएको उनले बताए।

चौधरीको पहिलो मिर्गौला भारतको लखनऊमा, दोस्रो विसं २०७२ मा, र तेस्रो यसपटक ‘पेयर एक्सचेन्ज’ प्रणालीमार्फत गैरनातेदारबीच अङ्ग साटासाट गरी प्रत्यारोपण गरिएको हो।

स्थापना भएको १३ वर्षमा प्रत्यारोपण केन्द्रले हालसम्म एक हजार ५०२ जनामा सफल मिर्गौला प्रत्यारोपण र ३५ जनामा कलेजो प्रत्यारोपण सम्पन्न गरिसकेको छ।