खोज

काठमाडौँ, १४ असोज।
देशभर डेंगी संक्रमणको अवस्था थप चिन्ताजनक बन्दै गएको छ। पछिल्लो एक साताको अवधिमा मात्र २ सय ७४ जनामा डेंगी संक्रमण पुष्टि भएको इपिडिमियोलोजी तथा रोग नियन्त्रण महाशाखा (इडीसिडी) ले जनाएको छ।

महाशाखाका अनुसार यो संख्याले ७५ जिल्लामा संक्रमण फैलिइसकेको पुष्टि गर्छ। यससंगै, चालू वर्षको पुस महिनादेखि हालसम्म देशभर कुल ५ हजार १ सय ९६ जनामा डेंगी संक्रमण देखिएको छ।

प्रदेशगत विवरण हेर्दा, गण्डकी प्रदेश सबैभन्दा बढी प्रभावित देखिएको छ, जहाँ हालसम्म १ हजार ३ सय २७ जनामा संक्रमण पुष्टि भइसकेको छ।
त्यसपछि बागमती प्रदेशमा १ हजार १ सय ९१, लुम्बिनीमा ९ सय ११, कोशीमा ७ सय ३७, सुदूरपश्चिममा ६ सय २२, कर्णालीमा २ सय ९६ र मधेश प्रदेशमा १ सय १२ जनामा डेंगी पुष्टि भएको छ।

पछिल्लो २४ घण्टामात्रै २३ जना नयाँ संक्रमित फेला परेका छन्। हालसम्म २ जना संक्रमितको मृत्यु भइसकेको इडीसिडीको तथ्यांकले देखाएको छ।

स्वास्थ्य विज्ञहरूका अनुसार डेंगी रोग पोथी लमखुट्टेको टोकाइबाट सर्ने गर्दछ। नेपालमा पहिलोपटक डेंगी संक्रमण सन् २००४ मा चितवनमा देखिएको थियो।