खोज

काठमाडौँ, २७ कात्तिक : वीर अस्पतालमा श्वासप्रश्वास सम्बन्धि १० वटा विभिन्न रोगका भाइरसको एकै पटक परीक्षण शुरु गरिएको छ ।
अस्पतालको मेडिकल जेनेटिक्स (अनुवाङ्शिक) प्रयोगशालामा श्वासप्रश्वास सम्बन्धी १० प्रकारका रोगको भाइरसको एकै पटक एकै समयमा परीक्षण शुरु गरिएको अस्पतालको मेडिकल अनुवाङ्शिक विभागकी प्रमुख डा. निलम ठाकुरले जानकारी दिइन् ।
उनले विरामीको एउटा रोगको भाइरसको फरक फरक परीक्षण गर्दा रोग पत्ता लगाउन समस्या भएकोले एकै पटक १० वटा रोगको भाइरसको परीक्षण गर्न थालिएको बताइन् । “पहिले ति १० वटा रोगका भाइरसको फरक फरक समयमा परीक्षण गर्ने गरेका थियौ । तर अहिले एकै पटक एकै समयमा परीक्षण गर्दा खर्च पनि कम लाग्दछ,” उनले भनिन, “कुन भाइरसको कारणले कुन रोग लागेको हो भन्ने कुरा पनि पत्ता लाग्दछ । धेरै पटक परीक्षण आवश्यक पदैन ।”
उनले भाइरसले रोग पत्ता लगाएपछि अस्पतालमा नै उपचार गर्ने बताइन् ।
यस्तै प्रयोगशालामा मस्तिष्क सङ्क्रमण सम्बन्धी ६ वटा भाइरसको पनि एकै पटक परीक्षण शुरु गरिएको विभागका प्रमुख डा. ठाकुरले जानकारी दिइन् । प्रयोगशालामा फोक्सोबाहेक अन्य भागमा लाग्ने क्षयरोगको पनि परीक्षण गरिन्छ ।
२०७३ सालमा अनुवाङ्शिक (जेनेटिक) रोगको पहिचार उपचार गर्ने स्थापना गरिएको प्रयोगशालामा जनशक्ति र उपचकरण अभावले रोगको परीक्षण नियमित हुन सकेको छैन । जिन (वङ्श)मा भएको अवस्थाले जन्मिने रोगहरुलाई अनुवांशिक रोग भनिन्छ।
“सरकारी रुपमा अनुवाङ्शिक रोगको पत्ता लगाउने यहि नै प्रयोगशाला रहेको छ,”उनले भनिन,“तर हामीसंग तीन जना मात्र जनशक्ति भएको र उपकरण पनि प्रयाप्त मात्रामा नभएको कारणले दैनिक रोगहरुको परीक्षण गर्न सकिरहेका छैनौ ।”
उनका अनुसार एक दिन विराएर पालो अनुसार रोगहरुको परीक्षण गर्ने गरिएको छ ।
अहिले प्रयोगशालामा २५ वटा अनुवाङ्शिक रोगका भाइरसको नियमति परीक्षण गर्ने गरिएको छ ।