खोज

काठमाडौँ, ५ मङ्सिर । सुष्मा कोइराला मेमोरियल अस्पतालले जलनमा परेका १८ वर्षमुनिका बालबालिकालाई पूर्ण रूपमा नि:शुल्क उपचार उपलब्ध गराउने भएको छ।

अस्पतालका प्रशासन प्रमुख प्रफुल्ल शर्माका अनुसार आगो, तातो पानी, करेन्ट तथा अन्य कारणले जलनमा परेका बालबालिकाका लागि नि:शुल्क उपचार कार्यक्रम निरन्तर जारी राखिएको छ। उनका अनुसार गत वर्ष मात्र १४२ बालबालिकाले यस कार्यक्रमअन्तर्गत निःशुल्क सेवा पाएका थिए।

अस्पतालका मेडिकल निर्देशक डा. सन्तोष भण्डारीले १८ वर्षमुनिका बिरामीलाई शल्यक्रिया, बेड सुविधा, ड्रेसिङ, औषधि लगायत सम्पूर्ण सेवा नि:शुल्क प्रदान गरिने जानकारी दिए।

सन् १९९७ मा जलनपीडितको उपचारलाई मुख्य लक्ष्य राखी स्थापना भएको यस अस्पतालले हालसम्म ५ लाखभन्दा बढी जलनका बिरामीलाई उपचार प्रदान गरिसकेको जनाएको छ।