खोज

काठमाडौं, २ माघ – नेपाल मेडिकल काउन्सिलको आगामी निर्वाचन अनलाइन मतदान मार्फत हुने भएको छ। काउन्सिलका रजिष्ट्रार डा. सतिस कुमार देवका अनुसार, चिकित्सकलाई सजिलो पार्न र अधिक सहभागीता सुनिश्चित गर्न अनलाइन मतदानको व्यवस्था गरिएको हो।

काउन्सिलले परीक्षा सञ्चालन र अनुशासन व्यवस्थापनलाई प्रभावकारी बनाउनका लागि पनि योजना तय गरेको छ। आगामी परीक्षाहरू कम्प्युटर–आधारित प्रणालीबाट सेट गरिनेछ र सातै प्रदेशमा एकैसाथ सञ्चालन हुनेछन्। यसबाट परीक्षार्थीलाई काठमाडौं आउनुपर्ने बाध्यता हट्नेछ र समय तथा यात्रा दुवै बचत हुनेछ।

अनुशासनसम्बन्धी मुद्दाहरू प्रभावकारी रूपमा व्यवस्थापन गर्न काउन्सिलले मेडिको–लिगल विभाग स्थापना गर्ने निर्णय पनि गरेको छ। यस विभागमा आवश्यक कानुनी, प्रशासनिक र प्राविधिक जनशक्ति तथा पूर्वाधार सुनिश्चित गरिनेछ। काउन्सिलको विश्वास छ कि यसले अनुसन्धान, मूल्यांकन र व्यवस्थापनलाई व्यवस्थित र विश्वसनीय बनाउनेछ।