खोज

काठमाडौँ, १२ माघ । स्वास्थ्य बीमा बोर्डले त्रिभुवन विश्वविद्यालय शिक्षण अस्पतालमा स्वास्थ्य बीमा सेवा पुनः सुचारु गर्ने विषयमा छलफल गरेको छ।

स्वास्थ्य बीमा बोर्डका कार्यकारी निर्देशक डा. कृष्ण प्रसाद पौडेल, त्रिवि शिक्षण अस्पतालका कार्यकारी निर्देशक प्रा.डा. सुभास प्रसाद आचार्य तथा मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरका कार्यकारी निर्देशक प्रा.डा. रत्नमणी गजुरेलबीच स्वास्थ्य बीमा सञ्चालनका विषयमा छलफल भएको हो।

गत माघ १ गतेदेखि स्वास्थ्य बीमा बोर्डले भुक्तानी नगरेको आरोप लगाउँदै त्रिवि शिक्षण अस्पतालले स्वास्थ्य बीमा कार्यक्रम स्थगित गरेको थियो।

छलफलका क्रममा स्वास्थ्य बीमासम्बन्धी नीतिगत सुधार, वैज्ञानिक दाबी मूल्यांकन प्रणालीलाई सुदृढ बनाउने, आपसी समन्वय तथा सहकार्यलाई प्रभावकारी बनाउनेलगायत अस्पतालले उठाएका विषयमा विज्ञस्तरमा थप परामर्श गरी यथाशीघ्र स्वास्थ्य बीमा सेवा पुनः सुचारु गर्ने विषयमा साझा प्रतिबद्धता व्यक्त गरिएको छ।