खोज

काठमाडौं। स्वास्थ्य मन्त्रालयकी पूर्वसचिव डा. संगीता मिश्रासँग विशेष अदालतले ५ लाख रुपैयाँ धरौटी मागेको छ।

न्यायाधीशहरू नारायणप्रसाद पौडेल, डिल्लीरत्न श्रेष्ठ र विदुर कोइरालाको संयुक्त इजलासले डा. मिश्रालाई पछि ठहरेबमोजिम हुने गरी पुर्पक्षका लागि धरौटीमा छाड्न आदेश दिएको हो।

अख्तियार दुरुपयोग अनुसन्धान आयोगले स्वास्थ्य सेवा विभागमा म्यामोग्राफी मेसिन खरिद प्रक्रियामा ठूला अनियमितता भएको ठहर गर्दै तत्कालीन महानिर्देशक डा. मिश्रासहित १४ जनाविरुद्ध भ्रष्टाचार मुद्दा दायर गरेको थियो।

आयोगका अनुसार ठेक्का सम्झौताका शर्तविपरीत मिलेमतो गरी सम्पूर्ण सामग्री नआउँदै झुट्टा बिल–बिजक, गलत प्रतिवेदन तयार गरी भुक्तानी गरिएको थियो। यस प्रकरणमा आयोगले करिब १४ करोड रुपैयाँ बिगो दाबी गरेको छ।

आर्थिक वर्ष २०८०–८१ मा म्यामोग्राफी मेसिन खरिदका क्रममा लागत अनुमान तयार गर्ने चरणदेखि नै राष्ट्रसेवक कर्मचारी र ठेकेदारबीच मिलेमतो भएको अभियोगपत्रमा उल्लेख छ।