खोज

बाजुरा: बाजुराको स्वामीकार्तिक खापर गाउँपालिका–२ भैसागाडकी एक महिलाले स्वास्थ्य संस्था पुग्न नपाउँदै बाटोमै शिशुलाई जन्म दिएकी छन्।

स्थानीय स्वास्थ्य संस्था फयालगाउँ आधारभूत स्वास्थ्य इकाइमा लैजाने क्रममा ती महिलामा अचानक प्रसव पीडा अत्यधिक बढेपछि बाटोमै प्रसुति गराउनु परेको हो। सोही क्रममा स्वास्थ्यकर्मी विस्ना रोकाया घटनास्थलमै पुगेर सुरक्षित रूपमा प्रसुति सेवा प्रदान गरेकी थिइन्।

स्वास्थ्यकर्मी रोकायाको सहयोगमा बाटोमै शिशुको सुरक्षित जन्म भएको बताइएको छ। हाल आमा र नवजात शिशुको अवस्था सामान्य रहेको स्वास्थ्यकर्मीहरूले जानकारी दिएका छन्।

ग्रामीण तथा दुर्गम क्षेत्रमा स्वास्थ्य सेवा सहज रूपमा उपलब्ध नहुँदा यस्ता घटना पटक–पटक दोहोरिने गरेका छन्। स्थानीयका अनुसार बाजुराका धेरै महिलाहरू अझै पनि स्वास्थ्य संस्था टाढा र यातायातको अभावका कारण घरमै वा बाटोमै बच्चा जन्माउन बाध्य हुने अवस्था रहेको छ।